Арсенал веќе 14 години не стигнал до четвртфиналето на најпрестижното клупско натпреварување во Европа, но под водство на Микел Артета има одлична сезона и води на табелата во Премиер – лигата. „Топчиите“ на пенали го елиминираа Порто во осминафиналето, но делуваат дека се во врвна форма и влегуваат во пресметката со Баерн како фаворити, иако последната нокаут пресметка меѓу двете страни во сезоната 2015/16 заврши со убедлива победа за Баварците со 10-2.
Сепак, Баерн ја има една од своите најслаби сезони во овој век и веќе се откажа од титулата во Бундес-лигата, откако заостанува зад лидерот Баер Леверкузен со дури 16 бода на шест кола до крајот.
Тимот на Томас Тухел, кој ќе ја напушти работата на лето, е во опасност дури и да ја заврши сезоната без трофеј за првпат по 12 години, бидејќи исто така предвреме испадна од Купот на Германија.
Сепак, класата и искуството се на страната на Германците, а напаѓачот Хари Кејн продолжува да постигнува голови.
Микел Артета нема да може да се потпре единствено на долгорочно повредениот Јуриен Тимбер, додека проблемите на Тухел се многу поголеми на кадровски план. Надвор од тимот се Сашо Боеј, Тарек Бухман и Буона Сар, а има неколку реконвалесценти како Мануел Нојер, Нусаир Мазрауи, Александар Павловиќ, Кингсли Коман и Лерој Сане, кои вчера се вратија на тренинзите на тимот.
