Легендата на Баерн Минхен и на Германија, Лотар Матеус, уште еднаш остро зборуваше против тренерот на Баварците, Томас Тухел, и процесите во клубот. Германскиот гигант загуби со 3-2 на гостувањето кај Хајденхајм откако по првото полувреме водеше со 0-2.
„Разочарувачкиот настап против Борусија Дортмунд и овој резултат доволно зборуваат. Томас Тухел повеќе не може да допре до тимот, тој одржува чудни прес-конференции и дава чудни изјави“, изјави Матеус за „Скај Германија“.
„Можам да замислам дека Баерн ќе реагира во следните 24 до 48 часа бидејќи тоа не може да продолжи. На тимот му треба нов импулс, а Томас Тухел повеќе не може да го обезбеди“, додаде легендарниот фудбалер.
Баварските директори Макс Еберл и Кристоф Фројнд најавија дека Тухел следната недела ќе го води Баерн Минхен против Арсенал во Лигата на шампионите.
