Поранешниот претседател на Шпанската фудбалска федерација, Луис Рубијалес, бил приведен од цивилната гарда при неговото враќање во Мадрид од Доминиканската Република во врска со истрага за корупција, пренесува „Ел Диарио“.
Рубијалес увери дека е подготвен да соработува со истрагата и се врати во Шпанија неколку дена порано од планираното. На 20 март, службениците за спроведување на законот упаднаа во куќата на поранешниот шеф на РФЕФ, како и во неговиот привремен престој во Доминиканската Република.
Судот ги истражува неправилностите при набавките во РФЕФ во изминатите пет години. Рубијалес ја предводеше федерацијата од 2018 до 2023 година.
Тој се повлече поради скандалот откако ја бакна во усни фудбалерката Џени Хермосо по победата на Шпанија на Светското првенство за жени. Поради тоа, против него беше отворена кривична постапка, во која шпанското обвинителство побара да биде осуден на две и пол години затвор.
