Најтрофејниот македонски клуб Вардар по ремито (0-0) со Гостивар во првото пролетно коло, денеска ќе го игра првиот меч на домашен терен, а противник е Брегалница, еден од директните ривали за опстанок во елитата.
Крилниот напаѓач Марјан Ристовски, едно од засилувањата за „црвено-црните“ оваа зима, најавува дека тимот ќе атакува на победа.
„Играме за првпат оваа пролетна полусезона пред домашната публика. Се надевам дека атмосферата ќе биде одлична, дека стадионот ќе биде полн и дека носени од поддршката на нашите навивачи ќе стигнеме до трите бода. Моите очекувања се победа и само победа. Верувам дека на теренот ќе се бориме и дека ќе дадеме не 100% туку 200% од силите, за да стигнеме до целта“, вели Ристовски.
Брегалница триумфираше минатото коло, а сега посакува да остане непоразена и на дуелот со Вардар.
„Од неодамна завршениот зимски преоден рок, може да забележиме дека во Вардар, како и кај нас, има позитивни промени. И изгледот на табелата, и ривалитетот меѓу клубовите налагаат да очекуваме дека ќе биде еден тежок натпревар, но сепак ние како екипа заедно со стручниот штаб имаме свои цели и замисли што ако ги оствариме, јас верувам дека позитивниот резултат нема да изостане“, истакнува левиот бек на Брегалница, Михаил Маневски.
ДВОЈКИ ПРВА ЛИГА, 20.КОЛО
ВАРДАР – БРЕГАЛНИЦА
БРЕРА – МАКЕДОНИЈА ЃП
ТИКВЕШ – РАБОТНИЧКИ
ВОСКА – СИЛЕКС
ШКЕНДИЈА – ГОСТИВАР
ВЧЕРА: СТРУГА ТЛ – ШКУПИ 2-2
