Напаѓачот на Њукасл, Калум Вилсон, ќе биде опериран по повредата на мускулот добиена во триумфот од 3-2 над Нотингем Форест и менаџерот Еди Хау се надева дека ќе може да се врати на терените пред крајот на сезоната.
Репрезентативецот на Англија оваа сезона се мачеше со многу повреди, а проблемите со препоните и потколеницата го оддалечија повеќе од два месеци од теренот.
„Тоа беше чудна повреда, тој имаше судир со дефанзивец на крајот од последниот натпревар. Тоа е пекторалниот мускул“, изјави Хау за новинарите.
„Направивме скенирање, се надевавме дека ќе може да продолжи. Кога отидовме кај специјалист, стана јасно дека му е потребна операција. Нема сомнеж дека ова е многу вознемирувачки за него. Се надевам дека ќе се врати пред крајот на сезоната“, додаде менаџерот.
Калум Вилсон има постигнато седум гола на 16 натпревари за Њукасл во досегашниот тек од сезоната.
