Енис Барди ќе отсуствува петнаесетина дена од фудбалските терени по повредата што македонскиот репрезентативец ја заработил за време на вчерашниот тренинг на Леванте. Неговиот клуб денеска објави дека станува збор за истегнување на мускулот, отстранувајќи ги стравувањата дека мускулот на десната нога е скинат, што ќе значеше и уште подолга пауза за македонскиот интернационалец.
Сепак, оваа повреда значи дека Барди нема да може да настапи на тешкото гостување на „Камп ноу“ против Барселона на 2 февруари, како и на претходните средби со Севилја и со Осасуна.
Енис Барди сезонава настапи на 15 натпревари за Леванте, притоа постигнувајќи два погодоци. Тој влезе во игра во второто полувреме од саботниот дуел со Алавес, на кој Леванте неочекувано загуби на домашен терен со минимални 0-1.
