Милан и официјално го финализираше договорот за потписот на Филипо Терачано. 20-годишниот бек пристигнува во тимот на Стефано Пиоли од Верона, а трансферната сума е 4 милиони евра. Во договорот се предвидени и бонуси од 1 милион евра. Дополнително, Верона ќе добие 10% од следниот трансфер на Терачано.
Младиот играч играше на сите натпревари на неговиот поранешен тим од почетокот на сезоната во Серија А, пред саботниот пораз од Интер со 2-1. Во 14 од нив беше стартер.
Терачано е младинец на Верона, а дебитираше во сениорскиот фудбал против Емполи за Купот на Италија во 2021 година. Има и еден натпревар за младинската репрезентација на Италија.
Договорот на дефанзивецот со Милан е до 2028 година. Во својот нов тим ќе игра со број „38“.
