Турскиот фудбалски шампионат, прекинат поради нападот врз судијата во понеделникот, ќе продолжи на 19 декември, соопшти денеска претседателот на Турската фудбалска федерација (ТФФ) Мехмет Бујукекши.
„Сите лиги ќе продолжат во вторник на 19 декември“, изјави Бујукекши.
Турскиот шампионат беше прекинат откако претседателот на Анкарагучу, Фарук Коча, го удри судијата Халил Умут Мелер по крајот на натпреварот против Ризеспор. Коча истрча на теренот по последниот свиреж на судијата и со тупаница го удри судијата во лицето.
Уште неколку луѓе истрчаа на теренот, клоцајќи го судијата додека тој лежеше на земја.
Коча и уште двајца мажи беа уапсени во вторникот, а судијата беше хоспитализиран.
Судијата Мелер денеска ја напушти болницата, а Коча се извини и најави оставка.
