Халил Умут Мелер, 37-годишниот нападнат турски фудбалски судија, ја напушти болницата во која беше примен откако беше жртва на физички напад веднаш по првенствениот натпревар меѓу Анкарагучу и Ризеспор.
Во понеделникот вечерта Мелер беше примен во болница откако претседателот на Анкарагучу, Фарук Коча, силно го удри по главата, а додека лежеше на тревникот доби уште неколку удари по телото, најверојатно од навивачи кои исто така истрчаа на тревникот.
Во меѓувреме, приведен е и претседателот на фудбалскиот клуб Анкарагучу под обвинение за нанесување телесна повреда на службено лице. Претседателот на турскиот прволигаш потоа му се извини на судијата и спортската јавност за неговото однесување, но изјави и дека „само“ му удрил шлаканица на судијата.
Судијата Халил Умут Мелер им кажа на обвинителите дека Фарук Коча го удрил со тупаница во главата и му се заканувал дека ќе го убие него, како и другите службени лица.
Челниците на турската фудбалска федерација допрва треба да решаваат што ќе се случи со продолжението на првенството, кое во среда го прекинаа на неодредено време.
