Шпанските медиуми повторно ја актуелизираа темата за наследникот на Карло Анчелоти на клупата на Реал Мадрид. Во јавноста кружат четири имиња, Чаби Алонсо, Зинедин Зидан, Алваро Арбелоа и Раул Гонзалес. Ова е наводно „четворката“ зад која се крие следниот тренер на Реал Мадрид.
Во емисијата „Ел Чирингито“ гостуваше Гути, легендарниот играч за врска на Реал Мадрид. Овој 46-годишен Шпанец е убеден дека Зинедин Зидан е единствениот вистински избор за нов тренер на Реал. Тој објасни зошто мисли дека враќањето на Французинот би било најдоброто решение за „кралскиот клуб“.
„Што се однесува до мене, Зидан е најдобриот можен тренер за Реал Мадрид. Тој е совршен за овој тим и за оваа средина, Флорентино Перез многу добро го знае тоа. Флорентино секако размислува за Чаби Алонсо, но никогаш не треба ништо да исклучувате кога е Реал во прашање. Никој не мислеше и дека Карло Анчелоти ќе се врати во Мадрид, па донесе нови титули“, изјави Гути.
