Обложувачкиот скандал во италијанскиот фудбал е сѐ поголем и поголем и сѐ повеќе се појавуваат имиња на инволвирани кои би можеле да се соочат со сериозни казни и суспензии. Медиумите во Италија информираат дека истражните органи дошле до заклучоци дека луѓето во Јувентус знаеле за проблемот со Николо Фаџоли.
Дефанзивецот на „старата дама“, Леонардо Бонучи, и член од стручниот штаб на Јуве, биле свесни за коцкарскиот проблем на играчот од средниот ред. Ова станало јасно откако Фаџоли ги предаде телефоните и таблетите. Во нив биле пронајдени муабети кои потврдуваат дека има луѓе внатре и надвор од клубот кои биле свесни што се случува.
Органите за спроведување на законот во Италија во моментов спроведуваат паралелни истраги против сите овие лица, бидејќи според законот за спорт и тие се кривично одговорни и може да се соочат со шестмесечни казни за неизвестување на властите навреме.
Италијанскиот печат тврди дека Фаџоли на сослушувањата потврдил сѐ, бидејќи се надева дека со признавањето на вината ќе постигне добар договор и ќе добие полесна казна. Тој во моментов се соочува со тригодишна забрана од фудбалот, но благодарение на соработката со властите може да одлежи само 18 месеци.
