Двајца инспектори на УЕФА дошле до заклучок дека Барселона заслужува да биде казнета со исфрлување од Лигата на шампионите за следната сезона поради случајот „Негреира“, информира шпанското издание „ABC“.
Вработените во европска централа го анализирале скандалот и врз основа на собраните информации подготвиле извештај според кој петкратниот шампион на Стариот континент треба да биде санкциониран.
Сега претседателот на УЕФА, Александар Чеферин, е пред избор дали да го слушне заклучокот на инспекторите или прво да ја чека одлуката на шпанските власти, кои исто така работат на случајот.
Истрагата покажа дека во периодот од 2001 до 2018 година, Каталонците му платиле 7,3 милиони евра на Хозе Марија Хенрикес Негреира за различни услуги, често опишани едноставно како „консултации“.
Меѓутоа, проблемот е што станува збор за потпретседател на Судската комисија во Шпанија. Ова се смета за конфликт на интереси бидејќи Негреира можеби влијаел на одлуките на судиите.
Од „Камп Ноу“ го демантираа постоењето на ваква пријава од УЕФА и сметаат дека ова е уште една вест која имала за цел да го оцрни клубот.
