Полувреме 0-0: Малку е ова за да се победи и Малта

Фудбалската репрезентација на Македонија не успеа да обезбеди водство против Малта по првото полувреме на арената „Тодор Проески“, во првиот натпревар од новиот циклус квалификации за ЕВРО 2024 во Германија. Иако има поголем посед на топка, македонската селекција сепак не создаде стопроцентна шанса за погодок. Малку е ова за да се пробие дури и Малта.

Во почетниот период Елиф Елмас имаше слалом низ противничката одбрана, нанижа неколку играчи, но на крајот падна барајќи пенал. Сепак, немаше интервенција ниту од ВАР собата.

Бојан Миовски се обиде двапати со удар со глава, но не беше прецизен, а впечаток е дека Македонија сепак не создаде „пекол“ за противникот пред нивниот шеснаесетник. Неколку соло обиди завршија без ефект.

На крајот, дури Малта можеше до водство. Метју Гилумие побегна, излезе пред Столе Димитриевски, но македонската одбрана спаси во последен момент.

Има уште 45 минути за да се поправи впечатокот.