Македонија го совлада Косово со 2-1 и се доближи на само еден чекор до пласман на Европското првенство. Одиме на 12 ноември во Тбилиси да го грабнеме ЕП. Полуфиналната плејоф пресметка која ја сметавме за историја сега е веќе во книгата на успесите, а ќе го чекаме историскиот меч против Грузија.
По автоголот на Кололи во 16.минута, Косово успеа да израмни по големото недорабирање на Столе Димитриевски и на Дарко Велковски во одбраната, а Флорент Хадерѓонај погоди со лоб удар од дваесетина метри.
Но, само четири минути подоцна, Македонија дојде до нова предност. Енис Барди изведе слободен удар, а Дарко Велковски со удар со глава погоди на вистинското место.
Во вториот дел, Пандев постигна гол, но беше поништен по прегледување на ВАР-снимка затоа што Аријан Адеми кој учествуваше во акцијата беше во офсајд. Пандев се закани и со одличен удар од 20 метри, но Мурич успеа да одбрани, а и Илија Несторовски шутираше со глава, но директно во добро поставениот голман на Косово. Во финишот и Езгјан Алиоски одлично шутираше, но без ефект.
Зенели беше единствената закана за Столе Димитриевски, но неговиот удар заврши за малку над гредата. Се до судиското продолжение. Жегрова шутираше од далечина, Димитриевски одби, налета Алити, а македонскиот голман фантастично уште еднаш одбрани. Во следниот напад Александар Трајковски пропушти супер-шанса за да го потврди триумфот.
Македонија успеа да го сочува водството од првиот дел и да обезбеди пласман во финалето на плејофот од Лигата на нации.
