Барселона нема да смее да купува нови играчи ова лето, изјави претседателот на Ла Лига, Хавиер Тебас, во интервју за шпанското радио „Естадио“. Каталонскиот гигант пред две години беше пред финансиски колапс, но со ново задолжување и договор со раководството на лигата сепак успеа да опстане, но под посебни услови.
Барселона мора да работи на таков начин што ќе гарантира финансиска стабилност, сѐ во договор со раководството на лигата. Минатото лето донесе бројни засилувања во клубот, а Тебас реши да не дозволи екстраваганција во следните два преодни рока.
„Барселона во јануари не смееше да донесе никого, а и на лето ќе добие забрана за влезни трансфери, изјави Тебас.
Избраниците на Чави Хернандез имаат резултатски многу добра сезона досега. И покрај испаѓањето од Лига Европа од Манчестер Јунајтед, тие сѐ уште имаат седум бода предност пред Реал Мадрид во првенството, а преостануваат уште 15 кола.
