Марио Ѓуровски беше провокативна фигура на Тајланд како фудбалер, стави одличен впечаток, а сега почнува нова епизода, тренерска, како предводник на Муангтонг Јунајтед, клубот каде и мина дел од фудбалската кариера. Вели дека ќе биде офанзивец и како тренер.
„Ќе нападнам и како тренер, не знам поинаку. Тоа е во крвта, тоа е моето гледиште за фудбалската игра. Ако си подобар, одиш да го победиш противникот“, вели Марио Ѓуровски.
Поранешниот македонски репрезентативец вели дека Горан Пандев е најдобриот со кого играл во ист тим во кариерата.
„Никогаш нема да ги заборавам моментите во фудбалската репрезентација на Македонија. Мирсад Јонуз ме повика и ми даде шанса, му должам голема благодарност, а не го заборавам ниту легендарниот Џон Тошак. Тогаш играв за Македонија, а бев резерва во Металург Доњецк. И да, посебен е впечатокот за Горан Пандев, мајстор на фудбалот, најдобар со кој некогаш сум бил во еден тим“, истакнува Марио Ѓуровски.
