Македонските репрезентативци Елиф Елмас и Илија Несторовски се запишаа во листата на стрелците во пресметката на Наполи и Удинезе во Серија А. На крајот, славеа „наполитанците“ со 3-2 и се зацврстија на врвот на табелата.
Елмас беше стартер, а Илија Несторовски доби шанса во 70.минута од мечот.
Виктор Осимен го отвори резултатот во 15.минута, а Пјотр Зиелински зголеми на 2-0 во 31.минута.
Елмас беше стрелец на третиот гол за Наполи во 58.минута. Тој прими топка по левата страна и со одлични дриблинзи се ослободи од ривалите постигнувајќи одличен гол.
Но, потоа одговори Илија Несторовски во 79.минута, за 3-1. Три минути подоцна погоди и Самарџиќ, но победата сепак му припадна на Наполи.
