Работнички и Ренова ќе ги одмерат силите на арената „Филип Втори“. Тимот на „романтичарите“ е значително реновиран по зимскиот преоден рок, а повратникот Баже Илијоски, кој ја презеде и капитенската лента, ја истакнува желбата за освојување на трите бода. Но, и потенцира дека тоа нема да биде лесна задача.
„Победата е наш фокус. Ќе сториме се за да ги освоиме трите бода на пролетната премиера. Но, тоа нема да биде нималку лесно. Ренова е квалитетен состав, нивна голема предност е воиграноста, играат одличен фудбал. Но, и ние веруваме во нашите квалитети, добро се подготвуваме во зимскиот период и сега е време тоа да го покажеме“, вели Баже Илијоски за официјалниот сајт на клубот.
Ренова само го надгради составот со нови имиња, но тренерот Никола Илиевски – Џиџи на располагање ќе го има речиси истиот фонд на фудбалери, што е значителна предност со оглед на добрата воиграност.
Натпреварoт меѓу Работнички и Ренова се игра со почеток во 14 часот. Главен судија на мечот е Марјан Гоцевски од Струмица, а ќе му помагаат сограѓаните Ѓорѓи Станковски и Кире Ангеловски.
