Пјер-Емерик Обамејанг во го напушти Арсенал и потпиша за Барселона, каде одигра фантастична полусезона. Сепак, ова лето одлучи да се врати во Англија и потпиша за Челси.
На Габонецот му стана јасно дека по доаѓањето на Роберт Левандовски тој повеќе нема да биде прв избор во нападот, па во самиот финиш на преодниот рок се пресели на „Стемфорд бриџ“.
Неговиот трансфер во Челси го навлече гневот на навивачите на Арсенал, кои му рекоа дека го предал клубот. Обамејанг своевремено беше прва ѕвезда на Арсенал, но сето тоа се промени откако тој се скара со менаџерот Микел Артета.
Шпанскиот стратег неколку натпревари не сметаше на Обамејанг, а Габонецот подоцна реши да ги спакува куферите и да го напушти клубот потпишувајќи за Барселона.
Обамејанг, секако, нема добро мислење за Артета, а навистина што мисли кажа во видео за кое не знаеше дека ќе биде снимено.
„Кога Артета треба да тренира играчи кои се ѕвезди, тогаш се губи и не може да го направи тоа. Му требаат само млади играчи кои не кажуваат ништо и само слушаат што зборува. Само така може да работи“, рече Обамејанг.
