Ајакс одлучи да им забрани на навивачите да носат пароли на стадионот во кои бараат дресови од фудбалерите за време и по натпреварот. Клубот од Амстердам тврди дека на овој начин решиле да ги заштитат играчите кои често се критикувани дека не му го дале дресот како подарок на некој од навивачите.
„Веќе не е можно играчите да ги исполнат сите барања. Секогаш кога поминуваат покрај навивачите без да им дадат дрес, често се критикувани и етикетирани како арогантни“, објави холандскиот клуб.
Ваквите пораки станаа многу чести на трибините. Претежно ги држат млади навивачи, па фудбалерите често се наоѓаат во незавидна положба кога на трибините ќе се најдат пораки со барање за дрес.
