Италијанскиот калчолигаш Наполи ова лето го искористи за подмладување на тимот. Клубот го напуштија голманот Оспина, Калида Кулибали, Дрис Мертенс и Лоренцо Инсиње. Сите имаат над 30 години, а клубот како замена донесе многу помлади играчи.
Сепак, нема да застане тука.
Голманот на Челси, Кепа Аризабалага, пристигнува во Неапол на позајмица. „Сините“ сакаат да се ослободат од Шпанецот кој го платија 80 милиони евра во 2018 година кога дојде од Атлетик Билбао, па додека е во Неапол ќе покриваат дури 75 отсто од неговата плата.
Друг играч кој треба да дојде на југот на Италија е младиот играч на Сасуоло, Џакомо Распадори. Тој ги договорил личните услови со клубот за петгодишен договор, според кој би земал плата од 2,5 милиони евра. Останува двата клуба да се договорат за цената на обештетувањето.
Третиот играч кој е на мета на „наполитанците“ е Доминик Шобошлаи, унгарски репрезентативец од Лајпциг. Тој треба да биде замена за Пјотр Зиелински кој ќе оди во Вест Хем. Требаше да чини 30 милиони евра, а Лучијано Спалети е голем фан на Унгарецот и би сакал да го види во неговиот подмладен тим.
