Англискиот премиерлигаш Ливерпул го потврди трансферот на Дарвин Нуњез од Бенфика. „Црвените“ платија веднаш 75 милиони евра, а со бонуси обештетувањето може да достигне и астрономски 100 милиони евра.
Дарвин потпиша договор до 2027 година, а ќе заработува 8 милиони евра по сезона. Она што е особено интересно, тој ќе го носи дресот со број „27“, кој досега му припаѓаше на Дивок Ориги.
Можеби Уругваецот би сакал „деветка“, но таа е во сопственост на Роберто Фирмино.
„Многу сум среќен што сум во Ливерпул, ова е огромен клуб. Играв против Ливерпул и гледав многу од нивните натпревари во Лигата на шампионите и тоа е мојот стил на игра. Тимот има одлични играчи и мислам дека ќе се вклопам. Ќе дадам се од себе. Дојдов во Ливерпул да освојувам трофеи“, изјави Нуњез.
