Рекордерот по бројот на настапи во германскиот национален тим, Лотар Матеус, верува дека неговиот поранешен клуб Баерн Минхен требало да му понуди нов договор на ѕвездата Роберт Левандовски, бидејќи ризикуваат да го загубат бесплатно следната година.
„Требаше многу порано да го продолжат договорот со Левандовски. Левандовски двапати е избран за фудбалер на годината, ако имаш шанса да врзеш таков играч, мора да направиш се за него“, изјави Матеус.
33-годишниот Левандовски има договор со Баерн Минхен до 2023 година, но се поврзува со трансфер во Барселона. Директорот на Баерн, Оливер Кан, ја отфрли можноста за трансфер ова лето, но разговорите за нов договор допрва треба да влезат во завршна фаза.
„Не гледам на неговите години, туку на настапите. Ако има четири или пет играчи како него во тимот, тогаш треба да размислите кој може да биде важен следната година и каде треба да се направи промена. Секоја екипа би сакала да го има Левандовски во своите редови“, додаде Матеус.
