Друловиќ ги предупреди Португалците: Внимавајте на Елиф Елмас!

МАКФУДБАЛ во Порто,

Поранешниот македонски селектор Љубинко Друловиќ во блесокот на кариерата го носеше дресот на Порто. Србинот во периодот од 1994 до 2001 година одигра 225 натпревари на „Драгао“ и постигна 40 гола. Потоа играше и за Бенфика, а во пресрет на големата пресметка меѓу Португалија и Македонија за пласман на СП во Катар, на барање на португалските медиуми направи анализа на македонскиот национален тим.

Тој вели дека Македонија воопшто не е наивен тим, а Португалците посебно треба да внимаваат на Елиф Елмас.

„Македонија, според звучноста, можеби делува како скромен тим, но не така. Имаат неверојатно силен тимски дух и работат напорно во текот на целиот меч. Имаат фудбалери кои играат во Шпанија и во Италија, а фантастично се поврзани и со селекторот, кој ги познава од многу млади. Можеби Македонија не е европска велесила, но е многу непријатен ривал за секого, а ќе биде и за Португалија. Одлично се бранат, опасни се при контранападите, брзо се трансформираат.

Португалија ќе се соочи со мотивиран тим кој нема што да загуби, а посебно внимание треба да се посвети на Елиф Елмас. Фудбалерот на Наполи е опасен, може да и направи многу проблеми на Портуалија. Посебно е опасен доколку влезе во соло акција од левата страна. На голот е одличен Столе Димитриевски, а лидери на тимот се и Стефан Ристовски, Езгјан Алиоски, но пред се и Аријан Адеми и Енис Барди. Тој е одличен шутер на слободни удари“, анализираше Љубинко Друловиќ за португалските медиуми.