Аргентинската ѕвезда Лионел Меси се уште ги нема договорено сите детали околу договорот со Пари Сен Жермен, но дали постои можност тој и да остане во Барселона?! Иако сите уште вчера го очекуваа да пристигне во Париз, сепак, тоа не се случи, а како што откриваат француските медиуми, претседателот на ПСЖ, Насер Ал Келаифи, и спортскиот директор Леонардо денеска ќе допатуваат на Ибица на конечен договор со Меси.
Во глобала, договорот е јасен, двегодишна соработка со опција и за трета сезона, а Меси ќе заработува околу 35 милиони евра годишно. Покрај тоа, ќе добие и 25 милиони евра бонус за потпис на договорот, со оглед дека е слободен агент.
Сепак, најновиот развој на настаните е дека и Барселона се уште се обидува да го лиценцира Лионел Меси за новата сезона. Како што известува „Кадена Сер“, Хоан Лапорта и раководните луѓе на Барселона синоќа до два наутро имале разговори со Хорхе Меси, таткото на фудбалерот кој воедно е и негов агент, околу евентуалната можност тој да остане на „Камп Ноу“. Се уште не е познато каква е опцијата за Лионел Меси да остане во Барселона, со оглед дека Ла Лига одби да го верификува договорот.
