На денешниот брифинг со новинарите, претседателот на Фудбалската федерација на Македонија (ФФМ), Масaр Омерагиќ, објави значајни новитети за Првата македонска фудбалска лига (ПМФЛ) во пресрет на новата сезона.
Најважната вест е дека сите натпревари од ПМФЛ ќе имаат директен телевизиски пренос – што претставува голем чекор напред за македонскиот клупски фудбал.
„Натпреварите од ПМФЛ ќе се играат во три, можеби и четири дена – петок, сабота, недела и понеделник. Договорено е да има пренос од секој натпревар. Засега имаме три стадиони со рефлектори, четвртиот ќе биде оној во Тетово“, изјави Омерагиќ.
Според него, три натпревари ќе се емитуваат на МРТ, а три на Арена Спорт, што ќе овозможи значително поголема медиумска покриеност и популаризација на домашното првенство.
Дополнително, ФФМ воведува и нов технолошки стандард – ВАР системот, кој од следната сезона ќе биде дел од сите натпревари.
„Веќе промовиравме дека Пума ќе биде нов спонзор кога е в прашање фудбалската топка. Секако, ќе има и ВАР, па лично очекувам следната сезона да биде на многу повисоко ниво од претходните“, додаде првиот човек на федерацијата.
Со овие чекори, македонскиот фудбал очекува сериозен квалитативен напредок и поуспешна комуникација со публиката и спортската јавност.
