Реал Мадрид е сериозно заинтересиран за 19-годишниот стопер на Борнмут, Дин Хујсен, и размислува за можноста да ја активира неговата откупна клаузула од 50 милиони евра.
Хујсен, кој минатото лето прејде од Јувентус во Борнмут за 15 милиони евра, импресионираше со своите настапи во Премиер – лигата, што привлече внимание од неколку европски гиганти, вклучувајќи го и Реал Мадрид.
Младиот дефанзивец неодамна дебитираше за шпанската репрезентација во Лигата на нации, што дополнително ја зголемува неговата атрактивност на пазарот. Хујсен во интервјуа изразувал наклонетост кон Реал Мадрид и восхит кон Серхио Рамос, што може да го олесни потенцијалниот трансфер.
Покрај Реал Мадрид, интерес за Хујсен покажаа и други клубови, како Ливерпул, кој бара замена за Вирџил ван Дајк. Сепак, желбата на Хујсен да игра за „кралскиот клуб“ може да им даде предност на мадриѓаните во трката за неговиот потпис.
Борнмут е свесен за интересот кон својот млад стопер и наводно размислува да ја зголеми неговата откупна клаузула со потпишување нов договор. Сепак, Реал Мадрид е подготвен уште ова лето да го реализира трансферот за да биде побрз од конкуренцијата.
Ако овој трансфер се реализира, Хујсен ќе му се приклучи на Реал Мадрид како дел од стратегијата на клубот за освежување и зајакнување на одбраната со млади и перспективни играчи.
