Сезоната во Премиер – лигата започна на тежок начин за Манчестер јунајтед, кој пред своите навивачи на „Олд Трафорд“ беше поразен со 0-1 од Арсенал. Единствениот гол на натпреварот го постигна дефанзивецот Рикардо Калафиори, кој уште во првото полувреме донесе радост за гостите од Лондон.
Иако резултатот не беше во нивна полза, менаџерот на „црвените ѓаволи“, Рубен Аморим, по дербито нагласи дека е задоволен од борбеноста и играта на своите избраници.
„Секако дека не можеме да бидеме среќни кога губиме на домашен терен. Но, морам да кажам дека тимот покажа квалитет и карактер. Заслуживме повеќе од овој натпревар, а според прикажаното можевме да извадиме и поинаков резултат. Сепак, ова е само почеток – мора да продолжиме понатаму и да се фокусираме на следниот предизвик“, изјави Аморим.
За Јунајтед следува гостување кај Фулам, натпревар во кој ќе се обидат да ја запишат првата победа во новата сезона.
