Тренерот на Херенвен, легендарниот Робин Ван Перси, остана шокиран по контроверзното реми (2-2) против Фортуна во 21. коло од холандскиот шампионат.
Неговиот тим имаше водство од 2-1 до 90. минута, но Фортуна израмни на 2-2 во ситуација кога на теренот имаше 12 играчи.
При една измена во 88. минута, еден од фудбалерите на Фортуна не го напуштил теренот, а судиите тоа не го забележаа. Со нумеричка предност, Фортуна изнуди аут, потоа корнер, по кој го постигна голот за изедначување.
„Ова е недозволиво. Фортуна играше со 12 играчи против нас, а тоа не смее да се случи на ова ниво. Навистина е тешко да се сфати ваква грешка. Веднаш го забележавме и го пријавивме на четвртиот судија, но играта продолжи како ништо да не се случило. Ова е ситуација што Холандската фудбалска асоцијација мора сериозно да ја разгледа“, изјави Ван Перси.
