Деле Али, некогаш еден од најталентираните англиски фудбалери, конечно најде нов клуб по долг период без тим. Од денес тој официјално е нов играч на италијанскиот клуб Комо, кој оваа сезона се натпреварува во Серија А и има високи амбиции.
По успешната проба, управата на Комо му даде „зелено светло“ и Деле Али потпиша договор. Ова означува нов почеток за играчот кој остави длабока трага во Тотенхем, каде што шест и пол сезони ја воодушевуваше публиката и се проценуваше на над 100 милиони евра во еден момент од кариерата.
Сепак, неговата форма почна да опаѓа уште додека беше во Тотенхем, а трансферите во Евертон и Бешикташ не успеаја да ја оживеат неговата кариера. Дополнително, бројните повреди го забавија неговиот напредок, што доведе до долга пауза од професионалниот фудбал.
Сега, по речиси две години без натпреварувачки фудбал, Деле Али повторно е на теренот, овој пат во дресот на Комо. Најважно е што тој повторно изгледа среќен и подготвен да се врати во својата најдобра форма. Навивачите на Комо со нетрпение го очекуваат неговото деби и се надеваат дека ќе видат блесоци од неговиот некогашен потенцијал.
