Италијанскиот тим Лацио ја зацврсти својата доминација во Лига Европа, заземајќи го врвот на табелата со 16 бодови по петтата победа во натпреварувањето. Лацијалите извојуваа убедлив триумф од 1-3 на гости кај Ајакс во Амстердам.
Гостите поведоа во 12. минута преку Чауна, додека Траоре донесе израмнување на почетокот од второто полувреме. Лацио, сепак, го обезбеди триумфот со головите на Деле-Баширу и Педро.
Ренџерс и Тотенхем ремизираа 1-1 во Глазгов. Домаќините поведоа преку Хамза Игамане во 47. минута, а израмнувањето за Тотенхем го донесе Дејан Кулушевски во 75. минута.
Порто ја совлада екипата на Митјиланд со 2-0, додека Реал Сосиедад беше доминантен против Динамо Киев, славејќи со 3-0. Андерлехт постигна важна победа со 1-2 на гости кај Спарта Прага.
Во натпревар полн со голови, Лион успеа да го надмине Ајнтрахт Франкфурт со 3-2. Бодо/Глимт го победи Бешикташ со 2-1, Макаби Тел Авив го совлада РФС со ист резултат, а Елфборг извојува минимална победа против Карабах од 1-0.
