Пари Сен Жермен одбива да му ги исплати долговите на Килијан Мбапе. Клубот му должи на фудбалерот 55 милиони евра, кои вклучуваат плати за последните три месеци на „Паркот на принцовите“ и бонуси.
Порано овој месец, претставници на Мбапе и ПСЖ имаа средба, но не постигнаа договор. Потоа, правната комисија при Француската професионална лига (ФПЛ) донесе одлука по случајот и објави дека клубот треба да ги исплати сумите.
Од ПСЖ одбија, и сега случајот ќе биде разгледан од Апелациската комисија на ФПЛ. Клубот има и други начини да го оспори решението. Фудбалерот, пак, се обрати и до УЕФА за решавање на спорот.
Килијан Мбапе го напушти Пари Сен Жермен како слободен агент летово и прејде во Реал Мадрид. Парижаните тврдат дека имале устмен договор со него претходното лето, дека тој ќе се откаже од бонусите доколку си замине без обештетување.
