Офанзивниот играч за врска на Баерн Минхен, Џамал Мусијала, сè уште не е целосно закрепнат од повредата и нема да игра на натпреварот од Бундес-лигата против вицешампионот од минатата сезона, Штутгарт, в сабота.
„Тој нема да биде во составот“, изјави тренерот Венсан Компани на прес-конференција.
Мусијала го пропушти нерешениот резултат 3-3 на Баерн против Ајнтрахт Франкфурт и победите на Германија во Лигата на нациите против Босна и Херцеговина и Холандија поради проблем со бутниот мускул.
„Сите се вратија од националните тимови. За жал, не сите се 100 проценти подготвени за игра. Џамал Мусијала нема да учествува“, изјави Компани, додавајќи дека ќе мора да „почека и да види“ дали дефанзивецот Дајот Упамекано ќе биде вклучен во составот.
Баерн е во серија од три натпревари без победа, вклучувајќи нерешени резултати во Бундес-лигата против шампионот Баер Леверкузен и Ајнтрахт Франкфурт. Но, Компани инсистираше дека не гледа причина да го менува агресивниот стил на игра, кој ги направил ранливи на контранапади.
„Ги анализиравме последните неколку натпревари. Сакаме да ги подобриме деталите. Ние 100% веруваме дека можеме да бидеме успешни на овој начин“, рече Компани.
Баерн ја заврши Бундес-лигата на трето место минатата сезона и не успеа да освои трофеј за првпат по една деценија, а Штутгарт имаше најдобра сезона откако ја освои титулата во 2007 година, завршувајќи на второто место.
„Тие направија одлична работа последните години. Нивните играчи напредуваа. За нас е добро што можеме да играме против тимови како нив“, додаде Компани.
Баерн е на врвот на табелата според гол – разликата пред Лајпциг, додека Штутгарт заостанува со пет бода на деветтото место.
