Одлуката на новото раководство на Манчестер Јунајтед, предводено од компанијата „ИНЕОС“ и Сер Џим Ретклиф, да го ослободи легендарниот поранешен менаџер Сер Алекс Фергусон од неговата улога како амбасадор на клубот предизвика силни негативни реакции.
Дополнителни контроверзи предизвика информацијата дека Фергусон повеќе нема да има пристап до соблекувалната на тимот, нешто што со децении беше дел од културата на „Олд Трафорд“.
Досега, личности како Фергусон, Сер Боби Чарлтон и бивши членови на управниот одбор како Дејвид Гил и Мајк Еделсон, имаа слободен пристап до соблекувалната по завршувањето на натпреварите на тимот.
Според англиските медиуми, новата политика не е насочена лично против Фергусон, туку важи за сите членови на управниот одбор. Промената е дел од новите правила кои го одразуваат колективното разбирање за тоа кој има право да влегува во просториите на тимот.
Иако Фергусон е ослободен од амбасадорската функција, тој ќе продолжи да биде неизвршен директор на клубот и ќе го задржи своето место во ложата на „Театарот на соништата“.
