Селекцијата на Црна Гора синоќа доживеа уште еден пораз откако загуби од Турција со 1-0 во Лигата на нации. Победата за Турците ја донесе Ирфан Кахвeчи со гол постигнат во 69. минута од натпреварот.
Роберт Просинечки и Црна Гора нема да го паметат овој натпревар по добро, бидејќи поразот од Турција запиша негативна страница во фудбалската историја на оваа земја.
Имено, ова е првпат Црна Гора да загуби пет натпревари по ред, а како селектор во овој неуспех ќе остане запишан токму Просинечки.
Негативната серија започна со пораз од 2-0 против Белгија во пријателски натпревар, по што Црна Гора не знае за позитивен резултат.
По поразот од Белгија, следуваше пораз на домашен терен од Грузија со 1-3, исто така во пријателски натпревар.
Сите се надеваа дека ќе биде подобро во официјалните натпревари, но и таму беа забележани уште три порази по ред.
Прво Исланд ја победи Црна Гора со 2-0 на домашен терен, а потоа во Подгорица славеше репрезентацијата на Велс со 1-2.
Вчера и Турција ја оправда улогата на фаворит и оствари победа против Црногорците.
„Загубивме три натпревари и тоа е тешка ситуација за нас, но одиме во Кардиф и тоа е нашата последна шанса да направиме нешто. Се надеваме на добар натпревар во Велс“, изјави Роберт Просинечки.
Црна Гора е многу блиску до испаѓање во Лига Ц на Лигата на нации.
Во седум натпревари како селектор на Црна Гора, Просинечки оствари две победи и пет порази.
