Македонската фудбалска репрезентација ја запиша својата втора победа во Лигата на нации, победувајќи ја Летонија со 0-3 во Рига. Јани Атанасов го постигна првиот гол во 35. минута, Лирим Ќамили го удвои водството на 0-2 во 70. минута, а Елиф Елмас со фантастичен погодок во 90. минута ја потврди убедливата победа.
Селекторот Благоја Милевски е задоволен од постигнатиот резултат, но истакна дека одредени аспекти од играта треба да се подобрат.
„Ова е триумф на играчите. Имавме добри потези, посед и контрола на играта, но имаше и моменти кои мора да ги подобриме и на тоа ќе се фокусираме во иднина. Поразот од Англија со 7-0 во Манчестер беше точката од која почнавме да го создаваме овој тим. Полека ја добиваме физиономијата и стилот на игра кој сакам да го гледам, но има простор за уште поголем напредок. Што се однесува до Елиф Елмас, тој заслужува огромна почит од сите, бидејќи без разлика на ситуацијата во клубот или други проблеми, секогаш е подготвен да игра за Македонија. Долг период играше за сите младински селекции, од У16 до У21. Добивме играч што го посакувавме и во Лирим Ќамили, но и сите други заслужуваат максимален респект за сѐ што прават за Македонија и покрај огромните проблеми и во клубовите, но и со повреди, вируси. Моравме денеска да одиме и со план „икс“, да влезе и Дарко Велковски“, изјави селекторот Милевски.
