МАКФУДБАЛ во Рига,
Македонија има предност од 0-1 по првото полувреме против Летонија во Рига, во третото коло од групата Ц на Лигата на нации. Единствениот гол го постигна Јани Атанасов во 35-тата минута.
Македонските фудбалери доминираа во играта на почетокот, додека Летонија се закануваше преку брзи контра-напади, обидувајќи се да го загрози голот на Столе Димитриевски. Првата вистинска можност ја создаде Летонија во 13-тата минута, кога Јанис Икауниекс биеше со глава од осум метри, но ја промаши целта.
Македонија возврати преку Јани Атанасов, кој во 24-тата минута шутираше од далечина, но топката отиде над голот. Капитенот Енис Барди, пак, во 26-тата минута упати удар кој заврши малку над пречката.
Во 30-тата минута, Атанасов упати уште еден удар, кој беше во рамките на голот, но голманот на Летонија, Матревикс, успешно одбрани. Сепак, во 35-тата минута, по одлична комбинација со Бојан Миовски, Атанасов успеа да го совлада Матревикс и да ѝ донесе водство на Македонија.
Столе Димитриевски со две интервенции се истакна на крајот на првото полувреме и ја сочува мрежата пред одморот.
