Швајцарскиот фудбалер Џердан Шаќири се врати во својот матичен клуб Базел по 12 години, соопшти денеска клубот.
Базел на својата веб-страница објави дека со Шаќири (32), кој доаѓа како слободен играч по раскинувањето на договорот со Чикаго Фајер, потпиша договор на три години.
Швајцарецот, кој е роден во Гњилане на Косово, изјави за клупската веб-страница дека е горд и многу среќен што се вратил во клубот каде што ја започнал својата кариера.
„Имам длабока врска со овој клуб и овој регион уште од кога бев дете. Како навивач и, секако, како играч… Сега повторно сакам да напаѓам со Базел и едвај чекам да ги видам навивачите на Јакоб Парк“, изјави Шаќири, кој го доби дресот со број „10“.
За првиот тим на Базел, Шаќири настапуваше од 2009 до 2012 година и во тој период постигна 23 гола на 130 натпревари.
Во текот на својата кариера, тој играше и за Баерн Минхен, Интер, Стоук, Ливерпул, Лион, а последните две сезони ги помина во САД, каде играше за Чикаго Фаер.
За репрезентацијата на Швајцарија одигра 125 натпревари и постигна 32 гола.
