Од Арсенал официјално го објавија трансферот на дефанзивецот Рикардо Калафиори, кој доаѓа од Болоња за сума од 45+5 милиони евра. Сепак, италијанскиот клуб ќе добие само половина од овие пари, бидејќи 50% од нив треба да одат на претходниот клуб на фудбалерот, а тоа е Базел.
Договорот на Калафиори со Арсенал е до летото 2029 година, и тој избра да го носи дресот со број „33“.
22-годишниот централен дефанзивец помина само една сезона во Болоња, играјќи 33 натпревари со два гола и пет асистенции. Со своите силни перформанси тој помогна Болоња да обезбеди историско учество во Лигата на шампионите. Неговите настапи за досегашниот тим му обезбедија прв повик за репрезентацијата на Италија, за кој одигра три натпревари како стартер на ЕВРО 2024.
Калафиори не ја криеше својата радост од трансферот.
„Чувството е неверојатно. Имаше некои тешкотии, но конечно сум тука и немам трпение да почнам да тренирам со тимот и да играм за навивачите. Всушност, уште од 12-13 години сонував да играм во Премиер – лигата, бидејќи гледам какво е нивото на првенството и според мене тука се најдобрите фудбалери во светот. Ова е еден сон не само за мене, туку и за сите. Многу разговарав со менаџерот Микел Артета и со Еду, и тие ме убедија, иако јас и претходно знаев дека сакам да дојдам тука. Мислам дека ова е најдобриот проект за мене за следните неколку години и мислам дека ќе се подобрам како играч“, изјави Рикардо Калафиори.
