Струга Трим Лум може да жали што испушти победа против лидерот Шкендија, со оглед дека имаше водство во најголемиот тек од натпреварот, но тренерот Срѓан Захариевски е задоволен од изданието на тимот. Вели дека стружани одиграле одличен меч и дека ремито е најреален епилог.
„Предизвик е да се игра против тим каков што има Шкендија. Ние не само што париравме добро, туку долго време имавме и водство. Тоа покажува дека добро работиме и дека одиме по вистинскиот пат. Мислам дека за македонски услови ова беше одличен натпревар и според прикажаното ремито е најреален исход“, изјави Срѓан Захариевски.
Во 14.коло од Првата лига кое е закажано веќе в среда, Струга Трим Лум му гостува на Борец во Велес.
