Легендарниот Диего Марадона ќе добие статуа пред стадионот на Наполи кој од неодамна го носи неговото име. Тој беше вистинско фудбалско божество во Неапол и вечно ќе остане во срцата на „наполитанците“. Диего Марадона почина на 25 ноември две седмици откако му беше опериран хематом во мозокот.
Италијанските медиуми откриваат дека в петок и официјално ќе отпочне процесот во градот Наполи за поставување на статуа на Диего Армандо Марадона. Советникот за спорт во градското собрание на Неапол, Чиро Бориело, и советничката за култура, Елеонора де Мајо, ја отпочнаа иницијативата, Градот Неапол даде дозвола за градба и в петок треба и официјално да стартува проектот за поставување на биста на легендарниот фудбалер.
