Фудбалската репрезентација на Мароко победи во хаотичен натпревар на Олимписките игри против Аргентина со 2-1. Мароко поведе во последните моменти од првиот дел со гол на играчот за врска на Генк, Билал Ел Кануос, а во 51. минута Суфијан Рахими реализираше пенал за 2-0.
Во 68. минута, Џулијано Симеоне, младиот напаѓач на Атлетико Мадрид и син на тренерот на Атлетико, Диего Симеоне, намали на 2-1. Натпреварот беше одбележан со инциденти.
Судијата го продолжи натпреварот за 15 минути поради постојано оддолжување на мароканските играчи и влегувања на навивачи на теренот. Во 16-тата минута од судиското надополнување, кога Аргентина постигна гол за израмнување, следуваше хаос.
На теренот беа фрлени бројни чаши и шишиња, како и други предмети, а потоа и факели меѓу Аргентинците кои славеа на трибините. Потоа неколку навивачи на Мароко влегоа на теренот, а обезбедувањето ги исфрли.
На теренот влезе и полицијата за да ги заштити Аргентинците. Судијата Глен Ниберг ги повика играчите веднаш да заминат во соблекувалната, а на големиот екран на стадионот во Сент-Етјен пишуваше: „Натпреварот е завршен, ве молиме, одете до најблискиот излез.“
По евакуацијата на стадионот, судиите во ВАР собата го прегледаа голот на Аргентина и го поништија. Натпреварот по два часа прекин продолжи и беше завршен. Аргентинците и Мароканците одиграа уште три минути и Мароко на крајот победи со 2-1.
