Реал Мадрид им донесе нова горчина на своите навивачи, откако загуби од Манчестер Сити со 1-2 во дербито од шестото коло во Лигата на шампионите. По овој резултат, алармот во редовите на најтрофејниот клуб е дефинитивно вклучен, а тренерот Чаби Алонсо се наоѓа под сè поголем притисок и критики.
„Кралевите“ започнаа жестоко и агресивно, со серија брзи акции, а тоа се исплатеше во 28. минута кога Родриго ја погоди мрежата по одличната асистенција од Џуд Белингам. Сепак, предноста траеше кратко – само осум минути подоцна Нико О’Рајли го постигна својот прв гол во дресот на Сити и го донесе израмнувањето.
Гостите добија дополнителна самодоверба и продолжија да создаваат опасни ситуации. Еден од нивните напади му донесе пенал на Сити во 43. минута, кој Ерлинг Халанд сигурно го претвори во гол. Со тоа англискиот тим ја презеде контролата и со водство замина на одмор.
Во вториот дел, темпото повторно беше високо, но вистинските шанси беа ретки. Реал Мадрид притисна во потрага по гол за израмнување – Родриго и Валверде имаа свои обиди, додека за гостите се закани Жереми Доку.
Клучниот момент следуваше по огромното промашување на Винициус Жуниор, кој не успеа да реализира речиси празна мрежа, што дополнително ја разочара домашната публика. Како што одминуваше времето, Сити излезе од дефанзива и се обиде да го реши мечот со уште еден гол, но истовремено остави простор зад својата одбрана.
Ендрик имаше идеална можност да донесе бод за Реал, но со удар со глава ја погоди гредата. Иако завршницата беше исклучително динамична, резултатот остана ист – 1-2 во корист на англискиот шампион.
Со оваа победа, Манчестер Сити конечно слави на „Сантијаго Бернабеу“ по шест години, додека Реал Мадрид продолжува да тоне во лоша форма, надоврзувајќи го поразот на оној од Селта Виго во Примера. И покрај сè, двата тима остануваат во горниот дел на табелата со 13 односно 12 бодови.
