Повратникот во Првата лига, тимот на Силекс, на одличен начин ја стартуваше сезоната. Составот на Горазд Михајлов не знае за пораз по три кола, освои седум бода и се наоѓа на второто место на табелата, веднаш зад „максималната“ Струга ТЛ.
Кратовци сакаат да ја продолжат серијата и на денешниот меч против Академија Пандев. Силекс игра одлично на домашен терен, досега забележа две победи, против Работнички и против Скопје, а целта е на ист начин да продолжат и против „пандевци“.
Ова е воведниот меч од четвртото коло во Првата фудбалска лига, кој е закажан за 16 часот, на стадионот во Кратово.
Академија Пандев, интересно, двапати загуби дома, а оствари блескава победа (0-5) на гости против Работнички. Денеска избраниците на Ѓорѓе Стојчев ќе имаат нов голем испит, затоа што никогаш не е лесно да се освои Кратово.
Останатите натпревари од четвртата рунда во Првата лига се играат утре, а се среќаваат: Скопје – Шкупи, Брегалница – Македонија ЃП, Работнички – Тиквеш, Шкендија – Струга Трим Лум.
