Шпанците во луда голеада ја елиминираа Хрватска по продолженија (ВИДЕО)

Шпанија се пласира во четвртфиналето на Европското првенство откако во Копенхаген ја совлада Хрватска со 5-3, дури по продолженија. Таму ќе го очекува подобриот од дуелот меѓу Франција и Швајцарија кој се игра вечерва во Букурешт.

Селекцијата на Златко Далиќ на стартот се определи за дефанзивен пристап, а поведе без да шутне кон голот, со неверојатниот кикс на голманот на Шпанија, Унаи Симон. Педри му ја врати топката од средината на теренот, а тој не успеа да ја сопре и отседна во мрежата во 20.минута.

Но, Шпанците брзо се вратија со голот на Пабло Сарабија во 38.минута од мечот, а во вториот дел направија и комплетен пресврт.

Цезар Аспиликуета во 57.минута ја доведе Шпанија во водство од 2-1, а Феран Торес го постигна третиот гол за „црвената фурија“ во 77.минута. И кога сите мислеа дека Шпанците ќе слават рутински, Хрватска се врати, но откако го промени пристапот во комплетно офанзивен.

Мислав Оршиќ намали на 3-2 во 85.минута, а Марио Пашалиќ во судиското продолжение израмни на 3-3.

Сепак, Шпанија имаше повеќе сили во продолженијата. Алваро Мората кој беше многу критикуван за слабата реализација, погоди во 100.минута за ново водство на „фуријата“, а Микел Ојзарзабал три минути подоцна го потврди триумфот. Асистент на двата гола беше Дани Олмо.