Шкупи го освои првиот бод оваа сезона по ремито против Работнички (1-1) во натпреварот одигран во Струга, во деветтото коло од Првата МФЛ. И покрај тоа, ниту тимот од Дебар Маало не може да биде целосно задоволен, бидејќи во самиот финиш имаше изгледни шанси за целосен пресврт и триумф.
Шкупи поведе во 25. минута преку Ерион Шуку. Луис Рибеиро упати удар откосо од левата страна, голманот Јакимов не реагираше најдобро и ја испушти топката, а Шуку без потешкотии ја смести во мрежата.
Работнички по паузата заигра многу поофанзивно. Ермедин Адем прво се закани во 60-тата минута по корнер од десната страна, а веќе во следниот напад успеа да израмни.
Димитар Трајков имаше можност за пресврт, но не реализираше, додека на другата страна Андреј Ричков сериозно се закани во 75-тата минута, но Јакимов со крајни напори одбрани.
Најголемата шанса за целосен пресврт Работнички ја имаше во 89-тата минута. По слободен удар од десната страна, Трајков шутираше со глава, одбраната на Шкупи спаси на гол-линијата, потоа се обиде Велиќ, а на крај и Велкоски ја погоди гредата. Сепак, втор погодок не дојде, па мечот заврши без победник.
Во Струмица, Брера и Башкими исто така одиграа 1-1. Аворнио во 35.минута успеа да донесе предност за Башкими. Брера стигна до израмнување со гол од пенал во 87.минута. Нзенгуе беше успешен реализатор на ударот од белата точка.
