Лидерот на табелата во македонскиот шампионат, тимот на Шкендија, се засили со бразилски интернационалец. Игор Вандерсон да Силва (24) е ново засилување за тетовскиот клуб. Тој потпиша договор на една и пол година и треба да ја засили конкуренцијата во навалната линија на составот на Ернест Ѓока.
Вандерсон Да Силва досега има европско искуство во Турција, тој беше член на Газијантеп и на Бурсаспор.
„За мене се е ново во Македонија, но ми се допаѓа организацијата во клубот и амбициите за освојување на титулата. Се надевам дека ќе дадам полн придонес во успесите на тимот во продолжение од сезоната“, изјави Игор Вандерсон да Силва за официјалниот сајт на Шкендија.
Бразилскиот крилен напаѓач ја почнал кариерата во Метрополитано, а во 2018 година од Униао Барбаренсе се пресели во Газијантеп. Следната сезона беше член на Бурсаспор, но поради пандемијата на коронавирусот се врати во Бразил и беше дел од Аква Санта.
Игор Вандерсон да Силва е трето засилување за Шкендија оваа зима, по Рубин Хебај и голманот Ферат Рамани.
