Не игра веќе фудбал на врвно клупско ниво по заминувањето во американската МЛС лига, но Лионел Меси ќе ја добие „Златната топка“ за 2023 година, пренесуваат медиумите ширум светот повикувајќи се на стори на Инстаграм објавено од неговиот семеен пријател Алесандро Досети.
„Официјално е. Лео ја освои Златната топка во 2023 година. Осмата „Златна топка“ сигурно му е последна. Нему му беше кажано денес”, напиша Досети.
Доколку неговата објава се покаже како вистинита, Аргентинецот дополнително ќе го подобри својот рекорд пред Кристијано Роналдо, кој освои пет вакви награди.
Меси ја заслужи наградата благодарение на освојувањето на првата титула светски шампион во декември минатата година во Катар, каде што ја освои и титулата најдобар играч со седум гола и три асистенции. За ПСЖ на 41 настап учествуваше во исто толку голови – лично постигна 21 и асистираше за уште 20. За Интер Мајами на 13 натпревари постигна 11 гола со пет асистенции.
Негов најголем конкурент за наградата е Ерлинг Халанд, кој беше „смртоносен“ во дресот на Манчестер Сити со 52 гола и девет асистенции на 53 натпревари, освојувајќи ги титулите најдобар стрелец во Премиер – лигата и во Лигата на шампионите, но не учествуваше на Светското првенство во Катар, на кое Норвешка не се пласираше.
