Италијанскиот калчолигаш Јувентус започна со подготовки пред неколку дена, а денеска на тимот се приклучи и Кристијано Роналдо. Португалецот имаше малку подолга пауза поради настапот на Европското првенство, но сега се стави на располагање на новиот тренер Масимилијано Алегри.
Како што објавија и претходно од Јувентус, во понеделник наутро Роналдо ќе се појави на тренинг кампот на Јувентус, Континаси, и е подготвен да ги направи воведните тестови и да го започне тренажниот процес.
Со месеци се шпекулираше за иднината на Португалецот. Прво се зборуваше дека Јувентус го продава ова лето, но сега е јасно дека тој ќе ја предводи „старата дама“ и следната сезона.
Роналдо има договор до летото 2022 година и се очекува Јувентус да му понуди продолжување на соработката. Во Серија А, Роналдо минатата сезона постигна 29 голови, а во сите натпреварувања на 54 натпревари постигна 44 погодоци со шест асистенции.
