Рома и Јувентус го затворија 31. коло од Серија А со реми 1-1 на „Олимпико“, резултат што не им донесе многу на ниту една од екипите во битката за пласман во Лигата на шампионите.
И покрај фактот што „волчицата“ под водство на Клаудио Раниери продолжува со позитивната низа – сега веќе 15 натпревари без пораз во калчото – домашниот бод против директен ривал како Јувентус сепак делува недоволен. Особено ако се има предвид дека Болоња со победа над Наполи има шанса да го зацврсти четвртото место и да им избега на конкурентите.
Гостите од Торино први се радуваа. Локатели донесе водство за „старата дама“ со погодок во 40. минута, користејќи момент на дезориентираност во одбраната на Рома. Но, одговорот дојде брзо по паузата. Шомуродов, кој влезе како замена, израмни на 1-1 во 49. минута и му донесе бод на домашниот тим.
Ова е прво реми за Рома по серијата од седум победи во Серија А, а пред неа е жешка пресметка со Лацио во римското дерби. Јувентус, пак, ќе се обиде да се врати на победнички пат дома против Лече.
